មិនបង់លុយតាមខែឱ្យ បាន ចុះបង្ក្រាបដើម្បីព្រមាន
27-June-2016 | ដោយ មែន កំសត់
រាជធានីភ្នំពេញ ៖ ផ្ទះលក់គ្រឿងទេសយីហោ លី សុគន្ធា មានបង្កប់កត់ឆ្នោតលួចលាក់មួយកន្លែង ត្រូវកម្លាំងនគរបាលខណ្ឌសែនសុខចុះបង្ក្រាប កាលពីវេលាម៉ោង៣រសៀលថ្ងៃទី២៦ មិថុនា ២០១៦ ដោយឃាត់ខ្លួនអ្នកកត់ និងអ្នកជួយមើលការខុសត្រូវចំនួន
៤នាក់ ព្រមទាំងដកហូតបានប្រាក់ និងក្រដាសឆ្នោតមួយចំនួនទៀត ។
ផ្ទះកត់ឆ្នោតលេខ២០០ ផ្លូវលេខ៥៩៨ ស្ថិតភូមិទំនប់ សង្កាត់ភ្នំពេញថ្មី ខណ្ឌសែនសុខ ដែលនេះជាលើកទី៣ ដែលសមត្ថកិច្ចចុះបង្ក្រាបផ្ទះកត់ឆ្នោតនេះ ខណៈដែលផ្ទះកត់ឆ្នោតធំៗជាច្រើនទៀតនៅក្នុងផ្សារចិនណាន់ និងនៅផ្សារឈូកមាស ពុំត្រូវបានបង្ក្រាប ឡើយ ។
ការបង្ក្រាបល្បែងស៊ីសងនេះ គឺដឹកនាំផ្ទាល់ដោយលោកវរសេនីយ៍ឯក ម៉ក់ ហុង អធិការនគរបាលខណ្ឌសែនសុខ និងមានការសម្របសម្រួលពីលោកអ៊ុំ សុភក្តិ ព្រះរាជអាជ្ញារងអមសាលាដំបូង រាជធានីភ្នំពេញ ។
ស្ត្រីដែលត្រូវឃាត់ខ្លួន ១-ឈ្មោះលី សុគន្ធា អាយុ៣៩ឆ្នាំ ជាម្ចាស់ផ្ទះ និងជាអ្នកកត់, ២-ឈ្មោះអឿន ចិន ភេទប្រុស អាយុ២៨ ជាចុងភៅ, ៣-ឈ្មោះជា សុភា អាយុ២៨ឆ្នាំ និង៤-ឈ្មោះផាត់ ផាណុត ភេទស្រី អាយុ១៧ឆ្នាំ ជាសិស្ស ។
លោកវរសេនីយ៍ឯក ម៉ក់ ហុង បានឱ្យដឹងថា បន្ទាប់ពីមានបទបញ្ជាពីលោកនាយឧត្តមសេនីយ៍ ជួន សុវណ្ណ អគ្គស្នងការរង នគរបាលជាតិ និងជាស្នងការរាជធានីភ្នំពេញ ឱ្យនគរបាលទាំង១២ខណ្ឌ យកចិត្តទុកដាក់លើបញ្ហាភូមិ-សង្កាត់ មានសុវត្ថិភាព ជាពិសេស ល្បែងស៊ីសងគ្រប់ប្រភេទ ។
គួរបញ្ជាក់ថា នៅក្នុងខណ្ឌសែនសុខមានល្បែងកន្ទុយលេខជាច្រើនកន្លែង ពុំត្រូវបានអាជ្ញាធរ និងសមត្ថកិច្ចចុះបង្ក្រាបឡើយ។ ការចុះបង្ក្រាបផ្ទះកត់ឆ្នោតខាងលើនេះ ត្រូវបានគេចោទប្រកាន់ និងរិះគន់ថា ដោយសារតែមេឆ្នោតទាំងនោះ មិនបង់ខែឱ្យ បានជាចុះបង្ក្រាប រីឯទីតាំងកត់ឆ្នោតនៅផ្សារចិនណាន់ជាច្រើន និងនៅផ្សារឈូកមាស បានដំណើរការយ៉ាងរលូន ៕ប្រភាពៈកោះសន្តិភាព
ចំនួនអ្នកទស្សនា
- ថ្ងៃនេះ8681
- ម្សិលមិញ14181
- សប្តាហ៍នេះ8681
- ខែនេះ123831
- ឆ្នាំនេះ123831
- សរុប20566287